Tscharni

Das isch es zuefälligs Föti, eis, wo ni gar nid ha wölle mache. Das Bild vom Tscharnerguet, däm Quartier visavi vo mim Block, isch am 10. Novämber öppis nach de Sibne am Abe uf mis Händy cho.
Im Louf vo de zwo letschte Wuche hani Liecht fotografiert, wo me i dene feischtere Tage dringend cha bruuche. Hie es paar Bischpil:

Block I

Dr Huswart (Hausmeister) het wider es paar Tag vor em 1. Advänt, dr Bethlehemstärn uf em Dach montiert. Mi gseht ne wytume.

Leuchtglas

Ds Sunneglas hani mit zämegläsnige Sache us em herbschtleche Garte gfüllt:

Haselnuss Platane

E Haselnuss, es paar Lampionblueme u Tannzäpfe.

4 Flamants

We me im Novämber Geburtstag u Flamingo gärn het, de gits äbe e Turte mit dene Stälzvögel.

Bibliothekslampe Blumenlampe

Alli Lampe, woni hie i däm Biitrag ha abbildet, hani einisch gschänkt übercho.

Ledkugel

Vil Liecht cha die Solarchugle uf em Balkon bi däm trüebe Wätter nümme abgä, aber im Summer zouberet si es wunderschöns Muschter us Liecht u Schatte a d’Dili.

Buch II

Das Lüüchtbuech isch i däm feischtere Novämber es bsunders schöns Liecht, sigs am Abe vor em Iischlafe oder am Morge zum Erwache.

Heisses Eisen

Das es Glettise e mysteschi Stimmig cha verbreite, we im Hingergrund d’Sunne ungergeit, hani o ersch die Wuche gmerkt, drby gletteni doch scho über füfzg Jahr.

Wolldecken

Im Gmeinschaftsruum vo üsem Block si Hilfsgüeter für d’Ärdbebeopfer vo Albanie bereit zum Abhole. E engaschierti albaneschi Bewohnere wird de die Dechine un angere Sache dene gä, wos dringend bruche u drfür sorge, dass mit dene Hilsgüeter nid öppe es Gschäft gmacht wird.

(Foto Block, Torte, Wolldecken: 2nd2nd, male)