Bevor i mi am Morge alege, luegeni gäng zersch Richtig Bärge u de vom 16. Stock abe uf d’Gärte vo de Reihehüser. Hüt em Morge si si mit Ryf überzoge gsy. Es wird Zyt, inezruume.

Uf dr Frontsite vo mir Tageszyttig steit, dass es i dr Papiirfabrigg bbrönnt heig u dass drum vorlöifig d’Zytig dünn wärdi sy. Überhoupt herrschi sit Längerem e Mangel a Rohmaterial u äbe drum e Knappheit a Zytigspapiir. Mi söu doch uf d’Website oder d’Äpp uswiiche. Söttis de mal mit Strom o knapp wärde, müesse mer de villicht d’Zytig wider teile, wie früecher, wo dr Dorfchäser ds Blatt het abonniert us de nach em Läse de Pure witergä het. We mir si dra cho, het dr Chäser scho ds nöiie übercho. Nid, dass i e bsunderegi Fründin vo Jodellieder wär, aber i dene herbschtleche Tage chunnt mer dr Täxscht ohrwürmlech vo so eim i Sinn: Es herbschtelet, es herbschtelet, lue d’Öpfel ryfe scho. Bald git es wider früsche Moscht, dä passt nid schlächt zur Purechoscht. Dr Winter isch nümm wyt – nachhär chunnt dr Jodel. Dr Rilke würd sech imene Blog-Biitrag besser mache, aber dä hani hie scho vor sibe Jahr erwähnt.

Es git ja gäng wider Momänte, woni a mi Indiereis (1978-1979) zrugg dänke. I keim vo dene elf Länder wo ni bereist ha, chöi d’Mönsche sicher si u es ruehigs Läbe füehre. I dr vergangene Wuche hani mi a Iran erinneret, u wi dr Schah het müesse ga – acht Jahr, nachdäm är zu dere pompöse 2500-Jahr-Fiir alli wichtige Höipter vo dr Wält iiglade het.

Us 37 Kilometer Side het dr Cheiser vor 50 Jahr e Luxus-Zältstadt z’Persepolis la boue. 50’000 Singvögel us Europa het me für die Megaparty zmitts i dr Wüeschti usgsetzt. D Vögel si scho nach drei Tag verdurschtet oder i de ischchalte Nächt erfrore. De Gäscht us dr ganze Wält – es richtigs Gruselkabinett – het’s a nüt gfählt. Ds Palace Hotel St. Moritz u Maxim’s Paris hei d’Verpflegig für die Edelcamper bis i ds chlinschte Detail vo deheim mitbbrunge: dr Peterlig für Gracia Patricias Salatplättli, ds Läberli für em Haile Selassies Zwärghung, dr Truthahn für e Tito, d’Änte für e Ceaușescu u dr Whisky für e Podgorny. Dr Schah hät’s gärn gseh, we ne Bundesrat us dr Schwiz a dä Event wär cho, schliesslech het er längi u ängi Beziehige zu üsem Land. D’Schwizer Regierig isch mit dere Iiladig i Chrott cho, het nid gwagt, ds Volk mit dr Teilnahm are settige usinnig verschwänderische Party z’vertöibe, het aber o dr „König der Könige“ nid wölle vore Chopf stosse. Natürlech het me de e gueti Lösig gfunge u het dr Alt Bundesrat Friedrich Traugott Wahlen i d’Wüeschti gschickt, dä früntlech Ma, wo sech zytläbens mit dr Grundnahrigsmittel-Sälbschtversorgig vo dr Schwiz befasst u nume i dr Abouschlacht kkämpft het. Gärn hätti ne gfragt, wie’s ihm z’Persepolis gfalle het u wär mit ihm am luxuriöse Chatzetisch – dr Schah isch iigschnappt gsy, dass nume dr Wahlen isch cho – platziert isch worde. Nach em Fescht heigi sech die iheimische Wächter u Putzmanne i dr heisse Wüeschtesunne dr Chopf mit em übrig bblibne Château Lafite Rothschild Magnum 1945 chönne chüehle – immerhin.