I bi i mim Läbe scho i mängem abglägne Egge gwohnt, ame Ort, wo sech Füchs u Hase guet Nacht säge, richtig im Gaggo usse, sozsäge im Gjät, sogar fasch z’Hingerfultige. O we me hunderti wurdi, lehrti me i dr chlyne Schwyz nid alli hingerwäldlerische Fläcke kenne. Äs git drvo vil zvil. Drum isch es schön u interessant, wen ni es Whatsappbild vo mire Fründin, ere gebürtige Bündnere u viersprachig, überchume. Si seit: „I ga uf ds Älpli“, we si i ihri Alphütte uf St. Antönie im Prättigou geit, stotzig obe höch über em Tal.

Ds St. Antönie git’s nid nume die idrückleche Lawineverbouige, sondern i vilne Hushaltige no alts Chacheligschirr us dr Hafnerei vo Lörtschers.
Mi cha gseh, dass ou zhingerst imene Tal, sozsäge am A … vo dr Wält, Wirtschaftsgschicht cha töpferet gschribe wärde.

Foto us dr Alphütte: Emanuela B., 04.07.2020